Hambalyada Howlwadeennada caafimaadka Soomaaliya

Guddoomiyaha Xisbiga Damiirka Soomaalinimada iyo Horumarka (Xisbiga SOCOD) Dr Maxamed Macallin Xasan asagoo ku hadlaya magaca hoggaanka, xubnaha iyo taageerayaasha Xisbiga SOCOD wuxuu hambalyo u dirayaa dhammaan dhaqaatiirta, kalkaaliyeyaasha iyo howlwadeennada kale ee ku howlan daweynta bukaannada qaba cudurka COVID-19 iyo cudurrada kale ee Dalka ka jira.

Guddoomiyaha Xisbiga SOCOD wuxuu ka codsanayaa dhammaan qeybaha kala duwan ee bulshada soomaaliyeed inay hiil iyo hooba la garab istaagaan howlwadeennadaas si naf hurnimo ah bulshada ugu adeegaya.

Dr Maxamed Macallin Xasan wuxuu ku boorrinayaa Dowladda dhexe, Dowlad goboleedyada iyo dhammaan Hey’adaha sida gaar ah ugu howlan la dagaallanka cudurka COVID-19 inay bulshada si hufan u gaarsiiyaan dawooyinka iyo agabka lama huraanka u ah la tacaalidda cudurka COVID-19.

Ugu danbeyn hoggaanka, xubnaha iyo taagerayaasha Xisbiga SOCOD waxay Eebbe ka baryayaan inuu ka qaado musiibadaan umaddeenna. Aamiin.

Wabillahi towfiiq.